لاہور: وزیراعلیٰ پنجاب مریم نواز نے  منشیات فروشی کے الزام میں گرفتار انمول عرف پنکی کے نیٹ ورک سے متعلق اعلیٰ پولیس حکام سے رپورٹ طلب کرلی۔

ذرائع نے بتایا کہ  سی سی ڈی نے بھی انمول عرف پنکی کے نیٹ ورک سے متعلق باقاعدہ تفتیش شروع کردی ہے، ملزمہ پنکی کے مبینہ شوہر سابق پولیس انسپیکٹر رانا اکرام کوبھی طلب کر لیا گیا۔

ذرائع کے مطابق سی سی ڈی سابق پولیس انسپیکٹر سےکیس کے بارے میں پوچھ گچھ کرےگی، لاہور میں درج مقد مے میں پنکی کو لاہور لائے جانے کا بھی امکان ہے۔

ذرائع نے مزید بتایا کہ کوٹ لکھپت میں درج مقدمہ میں ملزمہ پنکی کو اشتہاری نہیں کیا گیا تھا۔

واضح رہے کراچی میں گارڈن پولیس نے کامیاب کارروائی کرتے ہوئے منشیات فروش خاتون انمول عرف پنکی کو گرفتار کیا تھا جب کہ  گزشتہ روز  پنکی کے بھائی کے خلاف لاہور میں مقدمہ سامنے آیا ہے۔

لاہور پولیس کا دعویٰ ہے کہ 2022 میں شاداب کالونی میں لگژری گاڑی سے پنکی کا بھائی ملزم ریاض بلوچ منشیات دینے اترا تو پولیس نے قابو کرلیا، اس کے ساتھ موجود اس کی بہن انمول عرف پنکی گاڑی دوڑا کر نکل گئی، پنکی کے بھائی ریاض بلوچ پر لاہور میں 7 جنوری 2022 کو مقدمہ درج کیا گیا تھا۔