چوہدری قاسم مجید کی سیاست کا محور عوامی خدمت اور علاقائی ترقی ہے،راجہ فضل الرحمان
اسلام گڑھ ( بیورو چیف )
سابق وزیر اعظم آزاد کشمیر چوہدری عبدالمجید کے فرزند، وزیر خزانہ و ان لینڈ ریونیو آزاد کشمیر چوہدری قاسم مجید کی عوامی مقبولیت میں مسلسل اضافہ دیکھنے میں آ رہا ہے۔ حلقہ بھر میں جاری ترقیاتی منصوبوں، عوامی رابطہ مہم اور فلاحی اقدامات کے باعث سیاسی و سماجی حلقے انہیں آئندہ انتخابات میں ایک مضبوط امیدوار قرار دے رہے ہیں۔
اسی سلسلہ میں اورسیز کشمیری، سابق مشیر حکومت آزاد کشمیر اور سابق نائب صدر پاکستان پیپلز پارٹی برطانیہ راجہ فضل الرحمان کی پاکستان آمد کو بھی سیاسی طور پر اہم پیش رفت قرار دیا جا رہا ہے۔ راجہ فضل الرحمان آئندہ انتخابات میں چوہدری قاسم مجید کی انتخابی مہم میں بھرپور حصہ لیں گے اور اوورسیز کشمیریوں کو بھی متحرک کریں گے۔
راجہ فضل الرحمان نے اپنے ایک بیان میں کہا کہ چوہدری قاسم مجید نے اپنے والد چوہدری عبدالمجید کے عوامی خدمت کے مشن کو آگے بڑھاتے ہوئے حلقہ میں بے شمار ترقیاتی منصوبے مکمل کروائے۔ انہوں نے کہا کہ سڑکات، بجلی، پینے کے صاف پانی، تعلیمی اداروں اور صحت کی سہولیات کی فراہمی کے لیے تاریخی اقدامات کیے گئے، جن سے عوام براہ راست مستفید ہو رہے ہیں۔
انہوں نے مزید کہا کہ چوہدری قاسم مجید کی سیاست کا محور عوامی خدمت اور علاقائی ترقی ہے، یہی وجہ ہے کہ عوام اور اوورسیز کشمیری ان پر بھرپور اعتماد کا اظہار کر رہے ہیں۔ انہوں نے اس عزم کا اظہار کیا کہ آئندہ انتخابات میں پارٹی کارکنان اور اوورسیز کمیونٹی متحد ہو کر چوہدری قاسم مجید کی کامیابی کے لیے بھرپور کردار ادا کریں گے۔
سیاسی کارکنان اور عوامی حلقوں نے بھی راجہ فضل الرحمان کی آمد کو خوش آئند قرار دیتے ہوئے کہا ہے کہ اس سے پارٹی مزید مضبوط ہوگی اور انتخابی مہم میں نئی روح پیدا ہوگی۔
