متحدہ عرب امارات کی وزارتِ دفاع کا کہنا ہے کہ آبنائے ہرمز میں 2 اماراتی آئل ٹینکرز کو ایرانی کروز میزائلوں سے نشانہ بنایا گیا۔

اماراتی وزارت دفاع کے مطابق حملے کے نتیجے میں ایک جہاز کے عملے کا ایک  بھارتی رکن ہلاک اور 8 افراد زخمی ہو گئے۔

وزارتِ دفاع نے بتایا کہ یہ حملہ آبنائے ہرمز کے جنوبی راستے میں اس وقت کیا گیا جب دونوں ٹینکرز عمانی سمندری حدود میں موجود تھے۔

وزارت کے مطابق ہلاک ہونے والا ملاح آئل ٹینکر مومباسا بی پر سوار تھا جبکہ زخمی ہونے والے 8 افراد میں سے 4 کی حالت تشویشناک ہے، زخمیوں میں 6 بھارتی اور 2 یوکرینی شہری شامل ہیں۔

ابوظبی نیشنل آئل کمپنی  کی شپنگ کمپنی ADNOC L&S نے بعد میں تصدیق کی کہ خام تیل لے جانے والے جہاز مومباسا بی اور البہیہ  آبنائے ہرمز سے گزرنے کے دوران نشانہ بنے اور انہیں نقصان پہنچا۔

اماراتی وزارتِ دفاع کے مطابق حملوں کے بعد دونوں ٹینکرز میں آگ لگ گئی جس سے مالی نقصان ہوا تاہم آگ پر قابو پا لیا گیا ہے۔

دوسری جانب بھارت کی وزارتِ خارجہ نے آبنائے ہرمز کے قریب متحدہ عرب امارات کی ملکیت والے دو آئل ٹینکرز پر حملے کے بعد نئی دہلی میں ایران کے نائب سفیر کو طلب کیا ہے۔

ادھر ایران کے پاسدارانِ انقلاب نے منگل کو دعویٰ کیا کہ آبنائے ہرمز میں دو سپر ٹینکرز کو نشانہ بنا کر ناکارہ بنا دیا گیا۔

پاسداران کے مطابق ان جہازوں نے متعدد وارننگز کو نظر انداز کیا، اپنے نیوی گیشن سسٹمز بند کیے اور ایسے راستے سے گزرنے کی کوشش کی جسے پاسدارانِ انقلاب نے بارودی سرنگوں والا راستہ قرار دیا۔

تاہم پاسداران کے بیان میں ان جہازوں کے نام ظاہر نہیں کیے گئے اور نہ ہی یہ واضح کیا گیا کہ آیا یہ وہی ٹینکرز ہیں جن کا ذکر متحدہ عرب امارات کی وزارتِ دفاع نے کیا ہے یا نہیں۔