سردار زعیم سدوزئی کی آزاد کشمیر میں فائرنگ کے واقعات کی مذمت، حکمرانوں سے ہوش کے ناخن لینے کا مطالبہ
راولاکوٹ،بلوچ (نمائندہ خصوصی) پاکستان تحریک انصاف کے نامزد امیدواراسمبلی برائے حلقہ ایل اے 24 بلوچ سدھنوتی سردار زعیم سدوزئی نے آزاد کشمیر کے موجودہ حالات پر شدید تشویش کا اظہار کرتے ہوئے حکمرانوں کو خبردار کیا ہے کہ وہ ہوش کے ناخن لیں اور پرامن ماحول کو مزید خراب کرنے سے گریز کریں۔ انہوں نے کہا کہ پورے آزاد کشمیر کی طرح آج میرے حلقہ بلوچ میں بھی بے گناہ افراد کا خون بہایا گیا، جو انتہائی افسوسناک اور ناقابل قبول ہے۔اپنے بیان میں سردار زعیم سدوزئی نے الزام عائد کیا
کہ فورسز کے اہلکاروں کی جانب سے عوام پر براہ راست فائرنگ کی گئی، جس کے نتیجے میں قیمتی انسانی جانوں کا ضیاع ہوا۔ انہوں نے سوال اٹھایا کہ اپنے جائز حقوق کا مطالبہ کرنے والے عوام کو طاقت کے ذریعے خاموش کرانا کون سا انصاف ہے؟انہوں نے کہا کہ ظلم اور بربریت پر خاموش نہیں رہا جا سکتا، اب بہت ہو چکا، حکمرانوں کو عوام کے مسائل سننے اور انہیں ان کے بنیادی حقوق دینے ہوں گے۔ طاقت کے استعمال کے بجائے مذاکرات اور افہام و تفہیم کے ذریعے مسائل کا حل تلاش کیا جائے
۔سردار زعیم سدوزئی نے فائرنگ کے واقعات میں جاں بحق ہونے والے افراد کے اہل خانہ سے دلی ہمدردی اور تعزیت کا اظہار کرتے ہوئے کہا کہ متاثرہ خاندانوں کو تنہا نہیں چھوڑا جائے گا اور ہر ممکن تعاون و سپورٹ فراہم کی جائے گی۔انہوں نے کہا کہ کشمیر اور عوامی حقوق کے لیے نوجوانوں نے اپنی جانوں کے نذرانے پیش کیے ہیں، ان قربانیوں کو رائیگاں نہیں جانے دیا جائے گا۔ انہوں نے اس عزم کا اظہار کیا کہ عوام کے حقوق کے حصول کی جدوجہد جاری رہے گی اور قربانیاں ضرور رنگ لائیں گی۔
