چیئرمین یونین آف رائٹرز پاکستان فضل محمود کی زیرصدارت یونس گل کے اعزاز میں پروقار تقریب

چیئرمین یونین آف رائٹرز پاکستان فضل محمود کی زیرصدارت یونس گل کے اعزاز میں پروقار تقریب

شیخوپورہ( بیوروچیف/شیخ محمد طیب سے)یونین آف رائٹرز پاکستان کے زیرِ اہتمام ممتاز، صاحبِ اسلوب اور رہنمائی کرنے والے شاعر یونس گل کے اعزاز میں ایک پروقار تقریب کا انعقاد کیا گیا۔ تقریب کی صدارت چیئرمین یونین آف رائٹرز پاکستان فضل محمود نے کی جبکہ یہ تقریب لاہور روڈ پر واقع ایک مقامی ریسٹورنٹ میں منعقد ہوئی۔

تقریب میں شہر کی معروف ادبی شخصیات نے شرکت کی جن میں علامہ امجد جاوید، کاشف زرّین، انصار علی، صحافی و کالمسٹ شیخ محمد طیب، سینئر صحافی چوہدری ضیغم ورک، بشیر احمد، ڈاکٹر عبدالغفار، حمید رحمت، سجاد سمیع، محمد یاسین کھوکھر، سمسون مخزن اور طاہر محمود آسی شامل تھے۔ علامہ امجد جاوید نے یونس گل پر ایک جامع مقالہ پیش کیا جس میں انہوں نے ان کے شعری مجموعوں کا تنقیدی جائزہ لیا اور کہا کہ یونس گل کے شاگردوں کی بڑی تعداد آج بھی ادب و شاعری کے فروغ میں سرگرم عمل ہے۔ حلقۂ اربابِ ذوق شیخوپورہ کے جوائنٹ سیکرٹری انصار علی نے اپنے خیالات کا اظہار کرتے ہوئے

کہا کہ یونس گل باقاعدگی سے ہفتہ وار مشاعروں کا انعقاد کرتے رہے جہاں خصوصاً نوجوان شعرا کو اپنی صلاحیتوں کے اظہار کا موقع فراہم کیا جاتا تھا۔ نقاد و شاعر سجاد سمیع نے کہا کہ یونس گل کا تعلق ادبی تنظیم “الفانوس پاکستان” سے ہے جس کے پلیٹ فارم سے انہوں نے ادب کی ترویج میں نمایاں کردار ادا کیا۔ بزمِ الفت کے صدر کاشف زرّین نے کہا کہ نامساعد حالات کے باوجود یونس گل نے اپنی محنت اور لگن سے ایک منفرد مقام حاصل کیا۔ صدرِ تقریب فضل محمود نے اپنے خطاب میں معروف شاعر انور علیمی مرحوم کو خراجِ عقیدت پیش کرتے ہوئے کہا کہ وہ شیخوپورہ کے نمایاں شاعر تھے،

جبکہ ان کے بعد ابرار حامد نے 36 شعری مجموعے شائع کر کے نمایاں مقام حاصل کیا۔ انہوں نے مزید کہا کہ یونس گل کو یہ اعزاز حاصل ہے کہ وہ ابرار حمید کے شاگرد رہے ہیں۔ تقریب کے اختتام پر چیئرمین یونین آف رائٹرز پاکستان فضل محمود نے محمد یاسین کھوکھر کو ڈپٹی سیکرٹری مقرر کرنے کا اعلان بھی کیا، اس موقع پر ابرار حامد مرحوم کے ایصال ثواب کے لئے اجتماعی فاتحہ خوانی بھی کی گئی