آزاد جموں وکشمیر  الیکشن کمیشن نے نیا انتخابی شیڈول جاری کردیا، کاغذات نامزدگی جمع کرانےکی آخری تاریخ 23 جون مقرر کی گئی۔

اعلامیےکے مطابق کاغذات نامزدگی کی جانچ پڑتال 24 جون کو صبح 8 بجے سے ہوگی، درست امیدواران کی فہرست 24 جون کو ہی جاری کی جائےگی۔

نوٹیفکیشن کے مطابق ریٹرننگ آفیسر کے فیصلوں کے خلاف اپیلیں 25 تا 28 جون دائر کی جاسکیں گی، الیکشن کمیشن اپیلوں کی سماعت 29 اور 30 جون کو کرے گا، اپیلوں پر فیصلے یکم اور  2 جولائی کو سنائے جائیں گے۔

آزاد جموں وکشمیر الیکشن کمیشن کی جانب سے جاری نوٹیفکیشن کے مطابق کاغذات نامزدگی واپس لینےکی آخری تاریخ 3 جولائی دوپہر 2 بجے مقرر کی گئی، امیدواران کی فہرست 4 جولائی کو شائع کی جائےگی، انتخابی نشانات 5 جولائی کو الاٹ کیے جائیں گے، حتمی امیدواروں کی فہرست انتخابی نشانات کیساتھ 5 جولائی کو جاری ہوگی۔

نوٹیفکیشن میں بتایاگیاکہ آزادکشمیر قانون ساز  اسمبلی کے عام انتخابات کے لیے پولنگ27 جولائی کو ہوگی، پونچھ (راولاکوٹ) کے امیدوار کاغذات نامزدگی متعلقہ آر  اوکو جمع کرائیں گے، کاغذات نامزدگی کی جانچ پڑتال بھی ضلع پونچھ (راولاکوٹ) میں ہی ہوگی۔

الیکشن کمیشن کے مطابق امیدواروں کی درخواست پر نامزدگی فارمز جمع کرانےکی تاریخ میں توسیع کی گئی، عوامی سہولت اور امیدواروں کی تجاویزکو مدنظر رکھتے ہوئے شیڈول میں ترمیم کی، امیدوار مقررہ تاریخ اور وقت کے اندر کاغذات نامزدگی جمع کرانا یقینی بنائیں۔