اسلام گڑھ میں آپریشن بنیان مرصوص کے حوالے سے چنار پریس کلب کی تقریب
اسلام گڑھ (جاوید اقبال بٹ) چنار پریس کلب اسلام گڑھ کے زیر اہتمام معرکۂ حق ’’آپریشن بنیان مرصوص‘‘ کے حوالے سے ایک پروقار اور بھرپور تقریب کا انعقاد کیا گیا جس میں مختلف سیاسی، سماجی، کاروباری اور عوامی حلقوں سے تعلق رکھنے والی ممتاز شخصیات نے شرکت کی۔ تقریب میں وطن عزیز کی سلامتی، استحکام اور قومی یکجہتی کے حوالے سے خصوصی گفتگو کی گئی جبکہ افواجِ پاکستان کی قربانیوں اور خدمات کو زبردست خراجِ تحسین پیش کیا گیا۔تقریب میں امیدوار اسمبلی محمد نذیر انقلابی، امیدوار اسمبلی عظیم بخش چوہدری، چیئرمین بلدیہ اسلام گڑھ احسب شعیب، کونسلر الیاس راجپوت، کونسلر سجاد گوگا، ڈسٹرکٹ کونسلر توقیر نجیب ایڈووکیٹ، سابق اے ای او راجہ گلبہار اکرم، سابق کونسلر ڈیوزبری ڈاکٹر عبدالرزاق، صدر انجمن تاجران اسلام گڑھ حاجی محمد یونس، سابق ایڈمنسٹریٹر لالہ تصدق علی رفیقی، ٹھیکیدار سرفراز احمد، خان ملک، ٹھیکیدار رؤف مغل، عمران حمید مغل،ماسٹر رفیق،ماسٹر ظہیر،چوہدری خالد گلاسکو،مسیر رزاق،مسیر راشد،حاجی رفیق،اقبال محمود،کمانڈر محمد رفیق،حاجی عرفان بندوروی،مرزا محمد سلطان،سید صابر راجوروی،ڈاکٹر عابد اور چیف آفیسر اسلام گڑھ میونسپل کمیٹی امیر طارق سمیت دیگر معززین علاقہ نے شرکت کی۔
مقررین نے اپنے خطاب میں کہا کہ ’’آپریشن بنیان مرصوص‘‘ صرف ایک عسکری کارروائی نہیں بلکہ قومی عزم، اتحاد اور قربانی کی ایک عظیم مثال ہے جس نے پوری قوم کو ایک پلیٹ فارم پر متحد کرنے میں اہم کردار ادا کیا۔ انہوں نے کہا کہ پاکستان کی بقاء، سلامتی اور خودمختاری کے لیے افواجِ پاکستان نے لازوال قربانیاں دی ہیں جنہیں قوم ہمیشہ یاد رکھے گی۔
شرکاء نے اس بات پر زور دیا کہ موجودہ دور میں قومی اتحاد، باہمی ہم آہنگی اور مثبت سوچ کو فروغ دینا وقت کی اہم ضرورت ہے۔ مقررین کا کہنا تھا کہ دشمن عناصر ہمیشہ پاکستان کے امن اور استحکام کو نقصان پہنچانے کی کوشش کرتے ہیں لیکن پاکستانی قوم ہر مشکل گھڑی میں متحد ہو کر اپنے اداروں کے شانہ بشانہ کھڑی ہوتی ہے۔
تقریب کے دوران مقررین نے نوجوان نسل پر خصوصی زور دیتے ہوئے کہا کہ وہ سوشل میڈیا اور دیگر پلیٹ فارمز پر ذمہ دارانہ کردار ادا کریں اور ملک کے مثبت تشخص کو اجاگر کریں۔ انہوں نے کہا کہ نوجوان پاکستان کا روشن مستقبل ہیں اور ان کی درست رہنمائی ہی ملک کو ترقی اور خوشحالی کی راہ پر گامزن کر سکتی ہے۔
اس موقع پر شرکاء نے چنار پریس کلب اسلام گڑھ کی کاوشوں کو سراہتے ہوئے کہا کہ صحافتی ادارے معاشرے میں شعور اجاگر کرنے اور عوام کو درست سمت فراہم کرنے میں کلیدی کردار ادا کرتے ہیں۔ انہوں نے کہا کہ ایسے پروگرام قومی شعور بیدار کرنے اور نئی نسل میں حب الوطنی کے جذبے کو فروغ دینے میں انتہائی اہمیت رکھتے ہیں۔
تقریب میں ملکی سلامتی، شہداء کی قربانیوں اور پاکستان کی ترقی و خوشحالی کے لیے خصوصی دعا بھی کی گئی۔ شرکاء نے اس عزم کا اظہار کیا کہ وہ ہمیشہ ملکی سلامتی، استحکام اور قومی مفاد کے لیے متحد رہیں گے اور ہر قسم کے منفی پروپیگنڈے کا بھرپور مقابلہ کریں گے۔
آخر میں صدر چنار پریس کلب اسلام گڑھ چوہدری امجد علی نے تمام مہمانوں کی آمد پر شکریہ ادا کرتے ہوئے کہا کہ چنار پریس کلب ہمیشہ مثبت صحافت، قومی یکجہتی، عوامی مسائل کے حل اور معاشرتی بہتری کے لیے اپنا فعال کردار ادا کرتا رہے گا۔
