یوتھ کونسلر چوہدری مہران مہربان نے نئی گلی کا افتتاح کیا
اسلام گڑھ:( جاوید اقبال بٹ سے )وارڈ نمبر 8 اندراہ کلاں میں ترقیاتی کاموں کے سلسلہ میں ایک اہم پیش رفت سامنے آئی، جہاں یوتھ کونسلر چوہدری مہران مہربان کی خصوصی کاوشوں سے تقریباً 10 لاکھ روپے مالیت کی تین گلیاں منظور کی گئیں۔ ان منصوبوں میں شامل 230 فٹ طویل ایک گلی کی تکمیل کے بعد دوسری گلی کا باقاعدہ افتتاح بھی کر دیا گیا۔
افتتاحی تقریب میں اہلِ علاقہ، معززینِ محلہ اور نوجوانوں کی بڑی تعداد نے شرکت کی۔ شرکاء نے گلیوں کی منظوری اور تعمیراتی کام کے آغاز کو علاقہ کی دیرینہ ضرورت قرار دیتے ہوئے یوتھ کونسلر چوہدری مہران مہربان کی عوامی خدمات کو بھرپور انداز میں سراہا۔
اس موقع پر گفتگو کرتے ہوئے چوہدری مہران مہربان نے کہا کہ عوام کی خدمت ان کی اولین ترجیح ہے اور وارڈ کے بنیادی مسائل کے حل کے لیے وہ اپنی تمام تر توانائیاں بروئے کار لا رہے ہیں۔ انہوں نے وزیر خزانہ و ان لینڈ ریونیو آزاد کشمیر چوہدری محمد قاسم مجید کا خصوصی شکریہ ادا کرتے ہوئے کہا کہ ان کے تعاون سے علاقے میں ترقیاتی کاموں کا سلسلہ تیزی سے جاری ہے۔
اہلِ علاقہ نے امید ظاہر کی کہ مستقبل میں بھی اسی طرح مزید ترقیاتی منصوبے مکمل کیے جائیں گے تاکہ عوام کو بہتر سہولیات میسر آ سکیں۔
