اسلام گڑھ وارڈ نمبر 8 اندراہ کلاں میں 10 لاکھ روپے کی 3 گلیاں منظور
اسلام گڑھ:( جاوید اقبال بٹ )وارڈ نمبر 8 اندراہ کلاں میں ترقیاتی کاموں کے سلسلہ میں ایک اہم پیش رفت سامنے آئی، جہاں یوتھ کونسلر چوہدری مہران مہربان کی خصوصی کاوشوں سے تقریباً 10 لاکھ روپے مالیت کی تین گلیاں منظور کی گئیں۔ ان منصوبوں میں شامل 230 فٹ طویل گلی کا باقاعدہ افتتاح بھی کر دیا گیا۔
افتتاحی تقریب میں اہلِ علاقہ، معززین محلہ اور نوجوانوں کی بڑی تعداد نے شرکت کی۔ شرکاء نے گلی کی منظوری اور تعمیراتی کام کے آغاز کو علاقہ کی دیرینہ ضرورت قرار دیتے ہوئے کونسلر چوہدری مہران مہربان کی عوامی خدمات کو سراہا۔
اس موقع پر گفتگو کرتے ہوئے چوہدری مہران مہربان نے کہا کہ عوام کی خدمت ان کی اولین ترجیح ہے اور وارڈ کے بنیادی مسائل کے حل کے لیے وہ اپنی تمام تر توانائیاں بروئے کار لا رہے ہیں۔ انہوں نے وزیر خزانہ و ان لینڈ ریونیو آزاد کشمیر چوہدری قاسم مجید کا خصوصی شکریہ ادا کرتے ہوئے کہا کہ ان کی خصوصی توجہ اور تعاون سے یہ ترقیاتی اسکیمیں ممکن ہوئیں۔
انہوں نے مزید کہا کہ چوہدری قاسم مجید نے ہمیشہ علاقہ کی تعمیر و ترقی اور عوامی مسائل کے حل کے لیے مثبت کردار ادا کیا ہے، یہی وجہ ہے کہ عوام ان پر بھرپور اعتماد کا اظہار کر رہے ہیں۔ اہلِ علاقہ نے بھی امید ظاہر کی کہ مستقبل میں مزید ترقیاتی منصوبے مکمل کر کے وارڈ کو مثالی بنایا جائے گا۔
