قائدِ اعظم آزادی کپ 2026 کی ٹرافی کی رونمائی، 6 اور 7 اگست کو 8 ٹیمیں مدمقابل ہوں گی
جدہ (نورالحسن گجر سے): یومِ آزادی پاکستان کی تقریبات کے سلسلے میں اسکانکم (Asconcom) کمپنی کے زیرِ اہتمام منعقد ہونے والے “قائدِ اعظم آزادی کپ 2026” کی ٹرافی کی رونمائی کی پُروقار تقریب مقامی ہوٹل میں منعقد ہوئی، جس میں پاکستانی کمیونٹی کی معروف شخصیات، صحافیوں، ٹورنامنٹ میں شریک تمام ٹیموں کے مالکان، کپتانوں اور کھلاڑیوں نے شرکت کی۔
تقریب کا آغاز تلاوتِ کلامِ پاک سے ہوا، جبکہ نظامت کے فرائض سید جعفر اور شاہین آفریدی نے انجام دیے۔ تقریب میں پاکستان قونصلیٹ جدہ کے پریس قونصلر عرفان چوہدری، ممتاز سماجی رہنما چوہدری اکرم گجر، چوہدری اظہر وڑائچ اور کمیونٹی کی دیگر نمایاں شخصیات بھی موجود تھیں۔
اسکانکم کے چیئرمین چوہدری شفقت محمود نے اپنے خطاب میں کہا کہ قائدِ اعظم آزادی کپ 2026 کے انعقاد کا مقصد نوجوانوں کو مثبت اور صحت مند سرگرمیوں کی جانب راغب کرنا، کھیلوں کے فروغ کے ساتھ پاکستانی کمیونٹی میں اتحاد، اخوت اور یگانگت کو مضبوط بنانا ہے۔ انہوں نے کہا کہ اس نوعیت کے ایونٹس نوجوان نسل میں ٹیم ورک، نظم و ضبط اور قومی جذبے کو فروغ دیتے ہیں۔
آرگنائزنگ کمیٹی کے ارکان انجینئر عبدالمتین اور انجینئر سید جعفر نے ٹورنامنٹ کے انتظامات پر تفصیلی بریفنگ دیتے ہوئے بتایا کہ دو روزہ ایونٹ میں آٹھ مضبوط ٹیمیں ٹائٹل کے حصول کے لیے ایک دوسرے کے مدمقابل ہوں گی۔
انتظامیہ کے مطابق قائدِ اعظم آزادی کپ 2026 کے تمام میچز 6 اور 7 اگست کو جدہ نیٹس گراؤنڈ میں کھیلے جائیں گے۔ تقریب کے اختتام پر ٹرافی کی باقاعدہ رونمائی کی گئی، جبکہ تمام ٹیموں کے مالکان، کپتانوں اور منتظمین نے ایونٹ کو کامیاب، منظم اور یادگار بنانے کے عزم کا اظہار کیا۔