نیشنل پریس کلب اسلام آباد میں ٹی ایم اعوان کے والد مرحوم کے ایصالِ ثواب کے لیے دعائیہ تقریب
اسلام آباد:
نیشنل پریس کلب اسلام آباد میں ممبر کلب و کالم نگار ٹی ایم اعوان کے والدِ محترم محمد لطیف مرحوم کے ایصالِ ثواب کے لیے ایک پُروقار دعائیہ تقریب کا انعقاد کیا گیا، جس میں مختلف شعبہ ہائے زندگی سے تعلق رکھنے والے افراد نے بڑی تعداد میں شرکت کی۔
تقریب میں پریس انفارمیشن ڈیپارٹمنٹ کی ڈائریکٹر جنرل عائشہ تصدق، ڈائریکٹر شاہد رانجھا، نیشنل پریس کلب کے صدر اظہر جتوئی، راولپنڈی اسلام آباد یونین آف جرنلسٹس (RIUJ) کے سابق صدر طارق ورک، پاکستان فیڈرل یونین آف جرنلسٹس (ورکرز) کی صدر ڈاکٹر سعدیہ کمال ، سنئیر صحافی جاوید ملک ، وزارت خارجہ کے ڈائریکٹر جنرل احمد علی سہروہی، جمہوریہ انڈونیشیا کے سفارت خانے کے منسٹر قونصلر برائے پبلک ڈپلومیسی مسٹر رحمت ہندیارٹا،
زیبسٹ یونیورسٹی کے شعبہ سوشل سائنسز کے سربراہ ڈاکٹر طارق وحید، رفاہ یونیورسٹی کے شعبہ پبلک پالیسی کے کاشف ظہیر کمبوہ، سول جج میاں اظہر ندیم، پنجاب کالجز کے شعبہ اردو کے پروفیسر وسیم انور، اے بی این نیوز کے ڈائریکٹر نیوز محسن نواز، خبر رساں ایجنسی ایسوسی ایٹڈ پریس آف پاکستان (اے پی پی) کے ڈائریکٹر چائنیز نیوز سروس رب نواز باجوہ، ڈیلی اسلام آباد پوسٹ کے ایڈیٹر اِن چیف عنصر علی بھٹی، چیف ایڈیٹر روزنامہ شہر نامہ راجہ جاوید، ایڈیٹر فرائیڈے نیوز صابر علی بلوچ،
پاکستان عوامی تحریک شمالی پنجاب کے صدر قاضی شفیق، میڈیا کوآرڈینیٹر غلام علی سمیت دیگر صحافیوں، ادیبوں، دانشوروں، سرکاری افسران، سفارتی شخصیات، وکلا، اساتذہ اور سیاسی و سماجی نمائندگان نے شرکت کر کے مرحوم کے درجات کی بلندی کے لیے دعا کی اور لواحقین سے دلی ہمدردی اور تعزیت کا اظہار کیا۔
دعائیہ تقریب سے خطاب کرتے ہوئے مولانا ابوبکر مدنی نے کہا کہ موت ایک اٹل حقیقت ہے جس سے کسی کو مفر نہیں۔ انہوں نے کہا کہ دنیا عارضی جبکہ آخرت دائمی ہے، اس لیے ہر انسان کو چاہیے کہ وہ ہر وقت اپنی آخرت کی تیاری کرتا رہے۔ انہوں نے قبر کی تیاری، نیک اعمال کی اہمیت اور بالخصوص حسنِ خلق اپنانے پر زور دیتے ہوئے کہا کہ اچھے اخلاق، سچائی، دیانتداری اور دوسروں کے حقوق کی ادائیگی ہی انسان کی اصل کامیابی ہیں۔
تقریب کے اختتام پر مرحوم محمد لطیف کے لیے اجتماعی دعا کی گئی اور اللہ تعالیٰ سے استدعا کی گئی کہ وہ مرحوم کو جنت الفردوس میں اعلیٰ مقام عطا فرمائے اور اہلِ خانہ کو صبرِ جمیل نصیب کرے۔
ٹی ایم اعوان نے اس موقع پر اظہارِ خیال کرتے ہوئے تمام شرکاء کا شکریہ ادا کیا اور کہا کہ ان کے والد کی وفات ان کے لیے ایک بڑا صدمہ ہے، تاہم احباب اور صحافتی برادری کی محبت، دعاؤں اور تعاون نے اس دکھ کی گھڑی میں انہیں حوصلہ فراہم کیا۔
