سموگ نہیں، نظام ناکام ہے
عرفان مصطفیٰ صحرائی
ہر سال سموگ آتی ہے، ہر سال اجلاس ہوتے ہیں، ہر سال سیمینار منعقد کیے جاتے ہیں، کسانوں کو آگاہی دینے کے اعلانات ہوتے ہیں، گاڑیوں کے دھوئیں پر قابو پانے کی ہدایات جاری ہوتی ہیں اور ہر سال حکومتی ادارے اپنی کارکردگی کے دعوے کرتے نظر آتے ہیں۔ مگر سوال یہ ہے کہ آخر اس تمام مشق کے باوجود سموگ کم کیوں نہیں ہوتی؟ فضائی آلودگی کا گراف نیچے آنے کے بجائے اوپر کیوں جاتا ہے؟ درخت کم کیوں ہو رہے ہیں؟ اور سب سے اہم بات یہ کہ عوام کو صاف ہوا میں سانس لینے کا حق کب ملے گا؟
چنیوٹ کی ڈپٹی کمشنر عائشہ رضوان کی جانب سے نمبردار کنونشن میں کسانوں اور کاشتکاروں کو سموگ کے نقصانات سے آگاہ کرنے، فصلوں کی باقیات جلانے سے روکنے اور ماحول دوست زرعی طریقے اپنانے کی ہدایت اپنی جگہ ایک مثبت اقدام ہے۔ یقیناً دیہی علاقوں میں نمبردار عوام اور انتظامیہ کے درمیان رابطے کا اہم ذریعہ ہوتے ہیں اور کسانوں تک آگاہی پہنچانے میں ان کا کردار بھی اہم ہو سکتا ہے۔ لیکن ایک بنیادی سوال اپنی جگہ موجود ہے کہ کیا سموگ جیسے سنگین مسئلے کا حل صرف چند آگاہی کنونشنز، سیمینارز اور موسمی ہدایات میں پوشیدہ ہے؟
یہ مسئلہ آج کا نہیں، کئی برسوں پرانا ہے۔ مختلف حکومتیں آئیں، مختلف وزرائے اعلیٰ نے ماحولیات کی بہتری کے دعوے کیے، محکموں کے سربراہان تبدیل ہوئے، نئی پالیسیاں بنیں، کمیٹیاں تشکیل دی گئیں اور خصوصی اقدامات کے اعلانات ہوئے۔ ہر مرتبہ عوام کو یقین دلایا گیا کہ اس بار سموگ پر قابو پا لیا جائے گا، مگر نتیجہ آج بھی ہمارے سامنے ہے۔ موسم سرما شروع ہوتے ہی لاہور سمیت پنجاب کے متعدد شہروں میں فضائی آلودگی ایک بڑا چیلنج بن جاتی ہے۔
اصل المیہ یہ ہے کہ ہم مسئلے کے اسباب کو جانتے ہیں، ان کے نقصانات سے بھی واقف ہیں، لیکن ان اسباب کو ختم کرنے کے لیے سال بھر مستقل اور مؤثر حکمت عملی اختیار نہیں کرتے۔ جب فضا آلودہ ہو جاتی ہے، آنکھوں میں جلن شروع ہوتی ہے، سانس لینا دشوار ہوتا ہے اور شہری بیماریوں کی شکایت کرتے ہیں تو اچانک انتظامیہ کو یاد آتا ہے کہ گاڑیوں کے دھوئیں کو روکنا ہے، صنعتی یونٹس کی نگرانی کرنی ہے، اینٹوں کے بھٹوں کو چیک کرنا ہے اور کسانوں کو فصلوں کی باقیات جلانے سے منع کرنا ہے۔ سوال یہ ہے کہ یہ سب کچھ جون، جولائی، اگست اور ستمبر میں کیوں نہیں ہوتا؟ کیا سموگ صرف سردیوں میں پیدا ہوتی ہے یا اس کے اسباب پورا سال ہمارے ماحول کو نقصان پہنچاتے رہتے ہیں؟
یہاں محکمہ ماحولیات اور اس کے انتظامی ڈھانچے کی کارکردگی پر سنجیدہ سوالات اٹھتے ہیں۔ متعلقہ محکموں کے سربراہان کی ذمہ داری صرف اجلاسوں میں شرکت، پریس ریلیز جاری کرنے اور ماتحت عملے کو ہدایات دینے تک محدود نہیں ہونی چاہیے۔ انہیں یہ بھی بتانا ہوگا کہ گزشتہ برسوں میں فضائی آلودگی کم کرنے کے لیے کیا عملی اقدامات کیے گئے؟ کتنی صنعتوں کے اخراج کو کنٹرول کیا گیا؟ کتنی آلودہ گاڑیوں کے خلاف مؤثر کارروائی ہوئی؟ کتنے غیر قانونی بھٹوں کو ماحول دوست ٹیکنالوجی پر منتقل کیا گیا؟
کتنے درخت لگائے گئے اور ان میں سے کتنے درخت آج بھی زندہ ہیں؟اگر کئی سال گزرنے کے باوجود صورت حال میں نمایاں بہتری نہیں آ رہی تو متعلقہ افسران کی کارکردگی کا غیر جانب دارانہ آڈٹ ہونا چاہیے۔ محض عہدوں پر تعیناتی اور تبدیلیاں مسئلے کا حل نہیں۔ موجودہ انتظامی قیادت سمیت ہر ذمہ دار افسر کو اپنے نتائج کی بنیاد پر جواب دہ ہونا چاہیے۔ عوام کو یہ جاننے کا حق ہے کہ ماحولیات کے لیے مختص وسائل کہاں خرچ ہوئے اور ان کے نتیجے میں زمین پر کیا تبدیلی آئی؟
میرا حالیہ دورہ آذربائیجان اس حوالے سے میرے لیے ایک اہم مشاہدہ ثابت ہوا۔ وہاں کے شہروں میں درختوں، صفائی اور شہری ماحول کے حوالے سے جو نظم و ضبط دیکھنے میں آیا، وہ ہمارے لیے قابلِ غور ہے۔
خاص طور پر درختوں کی شناخت اور ان کی دیکھ بھال کا نظام توجہ کا مستحق ہے۔ میں نے بعض مقامات پر درختوں کے ساتھ بارکوڈ دیکھے، خاص طور پر باکو میں تو بہت زیادہ دیکھنے کو ملا ،جن کے ذریعے درخت سے متعلق معلومات تک رسائی ممکن تھی۔ یہ ایک ایسا تصور ہے جسے پاکستان کے شہری علاقوں میں بھی متعارف کرایا جا سکتا ہے۔
ذرا تصور کیجیے کہ اگر لاہور، چنیوٹ، فیصل آباد، راولپنڈی اور دیگر شہروں میں ہر سرکاری درخت کی باقاعدہ ڈیجیٹل رجسٹریشن ہو، اسے ایک منفرد شناختی نمبر دیا جائے، اس کی جگہ، قسم، عمر یا اندازاً عمر، صحت اور دیکھ بھال کا ریکارڈ محفوظ کیا جائے تو درختوں کی حفاظت اور نگرانی کتنی آسان ہو سکتی ہے۔ کسی درخت کو کاٹا جائے تو اس کی وجہ اور متعلقہ اجازت کا ریکارڈ موجود ہو۔ نیا درخت لگایا جائے تو اس کی نشوونما کی نگرانی بھی اسی نظام کے ذریعے کی جا سکے۔ یہ کوئی ناقابلِ عمل منصوبہ نہیں بلکہ جدید شہری انتظام کا ایک قابلِ عمل تصور ہے۔
ہمارے ہاں صورت حال اس کے برعکس دکھائی دیتی ہے۔ درخت لگانے کی مہم چلتی ہے، تصاویر بنتی ہیں، پودے تقسیم ہوتے ہیں، افتتاحی تقریبات ہوتی ہیں، لیکن کچھ عرصے بعد یہ معلوم کرنے والا کوئی نہیں ہوتا کہ لگائے گئے پودوں میں سے کتنے درخت بنے۔ کتنے پودے پانی نہ ملنے کی وجہ سے ضائع ہو گئے؟ کتنے درخت غیر قانونی طور پر کاٹ دیے گئے؟ اور کتنے درختوں کی جگہ دوبارہ شجرکاری کی گئی؟
شجرکاری کا اصل امتحان پودا لگانے کی تصویر نہیں بلکہ اس پودے کا کئی سال بعد تناور درخت بننا ہے۔ اگر ایک ہزار پودے لگائے جائیں اور چند ماہ بعد ان میں سے بیشتر ختم ہو جائیں تو یہ کامیابی نہیں، وسائل کا ضیاع ہے۔ ہمیں شجرکاری کی تعداد کے بجائے درختوں کی بقا کا تناسب کارکردگی کا معیار بنانا ہوگا۔
اسی طرح پنجاب حکومت کے صاف ستھرا پنجاب منصوبے کو بھی صرف اشتہارات، گاڑیوں، یونیفارم اور سوشل میڈیا کی تصاویر سے نہیں جانچا جا سکتا۔ وزیراعلیٰ پنجاب نے صوبے میں صفائی کا نظام بہتر بنانے کے لیے ایک بڑا منصوبہ شروع کیا اور اس مقصد کے لیے وسائل بھی فراہم کیے۔ یہ اپنی جگہ ایک مثبت حکومتی کوشش تھی۔ لیکن اصل سوال متعلقہ اداروں کی کارکردگی کا ہے۔ کیا گلیاں واقعی صاف ہوئیں؟ کیا دیہی علاقوں تک صفائی کا نظام مؤثر انداز میں پہنچا؟ کیا کوڑا کرکٹ کو مناسب طریقے سے ٹھکانے لگانے کا مستقل نظام بنا؟ کیا صفائی کے عملے کی حاضری اور کارکردگی کی نگرانی ہوئی؟
اگر کسی منصوبے میں کام سے زیادہ تشہیر، عملی صفائی سے زیادہ تصاویر اور عوامی سہولت سے زیادہ نمائشی سرگرمیاں نظر آنے لگیں تو اس منصوبے کے مقاصد متاثر ہونا شروع ہو جاتے ہیں۔ حکومت اچھی نیت سے منصوبہ شروع کر سکتی ہے، بجٹ بھی دے سکتی ہے، لیکن اگر عمل درآمد کرنے والے ادارے اپنی ذمہ داری پوری نہ کریں تو بہترین منصوبہ بھی مطلوبہ نتائج نہیں دے سکتا۔
یہی وہ مقام ہے جہاں وزیراعلیٰ پنجاب کو اپنی انتظامی مشینری سے سخت سوالات کرنے چاہئیں۔ منصوبوں کی کامیابی کا کریڈٹ لینے کے ساتھ ساتھ ان کے نتائج کی نگرانی بھی حکومت کی ذمہ داری ہے۔ اگر آج کسی منصوبے میں بدانتظامی، ناقص کارکردگی یا مالی بے ضابطگی سامنے آتی ہے تو کل اس کے سیاسی اور انتظامی اثرات بھی حکومت کو برداشت کرنا پڑ
سکتے ہیں۔ اس لیے ضروری ہے کہ کسی بھی ممکنہ خرابی کو ابتدا ہی میں دور کیا جائے، نہ کہ معاملہ بگڑنے کے بعد تحقیقات اور الزامات کا سلسلہ شروع ہو۔
سموگ کے معاملے میں بھی ہمیں یہی سوچ تبدیل کرنا ہوگی۔ کسانوں کو آگاہی دینا ضروری ہے، مگر کیا صرف کسان ہی فضائی آلودگی کے ذمہ دار ہیں؟ کیا صنعتی دھواں، ٹریفک کا اخراج، ناقص ایندھن، تعمیراتی سرگرمیوں سے اٹھنے والی گرد، کچرا جلانے کا عمل اور دیگر ذرائع آلودگی کا حصہ نہیں؟ پھر ساری ذمہ داری کسانوں کے سر ڈال کر اصل مسئلے سے توجہ کیوں ہٹائی جائے؟
کسان ہماری معیشت کی ریڑھ کی ہڈی ہیں۔ انہیں صرف پابندیوں اور جرمانوں سے مسئلے کا حصہ بنانے کے بجائے حل کا شراکت دار بنانا ہوگا۔ فصلوں کی باقیات کو جلانے کے بجائے ان کے مؤثر استعمال کے لیے جدید زرعی مشینری، مناسب مالی معاونت اور آسان سہولتیں فراہم کرنا ہوں گی۔ چھوٹے کاشتکار کے لیے جدید مشینری خریدنا آسان نہیں۔ حکومت اگر واقعی فصلوں کی باقیات جلانے کا سلسلہ روکنا چاہتی ہے تو اسے کسان کو متبادل بھی فراہم کرنا ہوگا۔ آگاہی کے ساتھ سہولت، پابندی کے ساتھ معاونت اور نگرانی کے ساتھ انصاف ضروری ہے۔
اسی طرح گاڑیوں کے دھوئیں کو روکنے کے لیے بھی محض سموگ سیزن میں چیکنگ مہم کافی نہیں۔ گاڑیوں کی فٹنس، دھوئیں کے اخراج کی جانچ، پبلک ٹرانسپورٹ کی بہتری اور صنعتی اخراج کی مسلسل نگرانی کے لیے پورا سال کام ہونا چاہیے۔ ہر ضلع میں فضائی معیار کی نگرانی کے قابلِ اعتماد نظام، شفاف ڈیٹا اور عوامی رپورٹنگ کا انتظام ہونا چاہیے تاکہ یہ معلوم ہو سکے کہ کون سا علاقہ زیادہ آلودہ ہے اور وہاں آلودگی کے بنیادی ذرائع کیا ہیں۔
میری نظر میں حکومت پنجاب کو فوری طور پر ایک سالہ جامع ماحولیاتی ایکشن پلان متعارف کرانا چاہیے، جس میں ہر محکمے کی ذمہ داری، واضح اہداف، مقررہ مدت اور نتائج کی پیمائش کا طریقہ طے ہو۔ ہر ضلع میں درختوں کی ڈیجیٹل رجسٹریشن، غیر قانونی کٹائی کی روک تھام، صنعتی اخراج کی نگرانی، گاڑیوں کی فٹنس، فصلوں کی باقیات کے متبادل انتظامات اور صفائی کے نظام کا باقاعدہ آڈٹ ہونا چاہیے۔ ہر تین ماہ بعد عوام کے سامنے کارکردگی رپورٹ پیش کی جائے تاکہ محض دعووں کے بجائے نتائج سامنے آئیں۔
یاد رکھیے، سموگ کسی ایک موسم کا مسئلہ نہیں، یہ ہماری انتظامی ترجیحات، منصوبہ بندی اور ماحولیاتی شعور کا امتحان ہے۔ اگر ہم صرف نومبر میں جاگیں گے تو ہر سال نومبر ہمیں ایک نئی مشکل کے ساتھ ملے گا۔ ہمیں سیمینار ضرور کرنے چاہئیں، کنونشن بھی ہونے چاہئیں، کسانوں کو بھی سمجھانا چاہیے، لیکن ان سرگرمیوں کو پورے سال کے عملی اقدامات کا حصہ بنانا ہوگا۔
آخر میں ایک سوال وزیراعلیٰ پنجاب، محکمہ ماحولیات کے ذمہ داران، ضلعی انتظامیہ اور تمام متعلقہ اداروں سے ہے: عوام کو صاف ہوا کب ملے گی؟ کب ہمارے بچوں کو آلودہ فضا کے بجائے صحت مند ماحول میسر ہوگا؟ کب درخت لگانے کے ساتھ ان کی حفاظت بھی یقینی بنائی جائے گی؟ اور کب سرکاری منصوبوں کی کامیابی کا فیصلہ تصویروں اور پریس ریلیز کے بجائے زمینی حقائق سے ہوگا؟
یاد رکھیے! سموگ اچانک پیدا نہیں ہوتی، اسے پیدا ہونے دیا جاتا ہے۔ اور جب ادارے پورا سال سوئے رہیں تو سردیوں میں سیمینار منعقد کرنے سے فضا صاف نہیں ہوتی۔ ہمیں موسمی مہمات نہیں، مستقل نظام چاہیے؛ اعلانات نہیں، احتساب چاہیے؛ اور شجرکاری کی تصاویر نہیں، محفوظ درخت چاہئیں۔ کیونکہ صاف ہوا کوئی حکومتی احسان نہیں، عوام کا
بنیادی حق ہے۔