اسلام گڑھ میں افتخار کلوال کے اعزاز میں تقریب صحافتی خدمات کو مقررین نے سراہا
اسلام گڑھ (جاوید اقبال بٹ) چنار پریس کلب (رجسٹرڈ) اسلام گڑھ کی جانب سے برطانیہ میں مقیم معروف صحافی، سماجی شخصیت اور چنار پریس کلب اسلام گڑھ کے سابق ممبر افتخار احمد کلوال کے اعزاز میں ایک پُروقار تقریب کا انعقاد کیا گیا۔ تقریب میں صحافیوں، سماجی و سیاسی شخصیات، نوجوانوں اور مختلف شعبہ ہائے زندگی سے تعلق رکھنے والے افراد نے بڑی تعداد میں شرکت کی۔
تقریب کے دوران مقررین نے افتخار احمد کلوال کی صحافتی خدمات کو زبردست خراجِ تحسین پیش کرتے ہوئے کہا کہ انہوں نے برطانیہ میں رہتے ہوئے نہ صرف مثبت اور ذمہ دار صحافت کو فروغ دیا بلکہ مسئلہ کشمیر، اوورسیز کشمیری کمیونٹی اور خطے کے عوامی مسائل کو بھی موثر انداز میں اجاگر کیا۔ مقررین کا کہنا تھا کہ بیرونِ ملک مقیم صحافی اپنے وطن اور کمیونٹی کی آواز دنیا تک پہنچانے میں اہم کردار ادا کر رہے ہیں، جن میں افتخار احمد کلوال کا نام نمایاں حیثیت رکھتا ہے۔
تقریب میں محمد حسیب، دانش کشمیری اور حیدر علی بھی افتخار احمد کلوال کے ہمراہ موجود تھے جبکہ چنار پریس کلب اسلام گڑھ کے عہدیداران اور ممبران نے مہمانوں کا پرتپاک استقبال کیا۔ اس موقع پر صحافتی امور، آزاد کشمیر میں میڈیا کے کردار، نوجوان صحافیوں کی تربیت اور موجودہ دور میں ذمہ دار صحافت کی اہمیت پر بھی تفصیلی تبادلۂ خیال کیا گیا۔
مقررین نے کہا کہ صحافت ایک مقدس پیشہ ہے اور معاشرے میں مثبت تبدیلی لانے کے لیے صحافیوں کا کردار نہایت اہم ہے۔ انہوں نے اس بات پر زور دیا کہ صحافی برادری کو اتحاد، باہمی احترام اور پیشہ ورانہ اصولوں کو فروغ دینے کے لیے مشترکہ طور پر کام کرنا ہوگا۔
تقریب کے اختتام پر چنار پریس کلب (رجسٹرڈ) اسلام گڑھ کی جانب سے افتخار احمد کلوال کو ان کی گراں قدر صحافتی خدمات کے اعتراف میں خصوصی شیلڈ پیش کی گئی جبکہ انہوں نے تقریب کے انعقاد پر چنار پریس کلب کے عہدیداران اور ممبران کا شکریہ ادا کرتے ہوئے کہا کہ وہ ہمیشہ اپنے علاقے، صحافتی برادری اور مسئلہ کشمیر کے لیے اپنی خدمات جاری رکھیں گے۔
