پاکستان عوامی تحریک کے منشور پر عملدرآمد انتہائی ناگزیر ہے، مہر شفیق احمد قادری
شیخوپورہ(بیوروچیف/شیخ محمد طیب سے)پاکستان عوامی تحریک کے منشور پر عملدرآمد انتہائی ناگزیر ہے، ان خیالات کا اظہار ضلعی صدر پاکستان عوامی تحریک شیخوپورہ مہر شفیق احمد قادری نے تحریک منہاج القرآن شیخوپورہ کے زیر اہتمام جامع مسجد ارشاد بی بی میں منعقدہ درسِ قرآن کے بعد میڈیا سے گفتگو کرتے ہوئے کیا۔ انہوں نے کہا کہ مہنگائی، بے روزگاری اور فاقہ کشی سے تنگ عوام خودکشیوں پر مجبور ہو چکے ہیں جبکہ حکومتی پالیسیاں مکمل طور پر ناکام نظر آتی ہیں، انہوں نے کہا کہ پاکستان عوامی تحریک کا منشور دراصل ایک فلاحی، اسلامی اور عوام دوست نظام کی بنیاد فراہم کرتا ہے۔
بانی پاکستان عوامی تحریک ڈاکٹر طاہر القادری کی شبانہ روز کاوشوں کا مرکز و محور اور ہماری منزل “مصطفوی انقلاب” ہے۔ انہوں نے مزید کہا کہ موجودہ حالات میں ضرورت اس امر کی ہے کہ ریاستی ادارے عوامی مسائل کے حل کے لیے سنجیدہ اقدامات کریں اور عام آدمی کو ریلیف فراہم کیا جائے۔ انہوں نے اس بات پر زور دیا کہ کرپشن، ناانصافی اور اقربا پروری جیسے ناسوروں کا خاتمہ کیے بغیر ملک ترقی کی راہ پر گامزن نہیں ہو سکتا۔ مہر شفیق احمد قادری نے کہا کہ پاکستان عوامی تحریک ملک میں عدل و انصاف، مساوات اور حقیقی جمہوریت کے قیام کے لیے اپنی جدوجہد جاری رکھے ہوئے ہے
اور عوام کو ان کے بنیادی حقوق دلوانے کے لیے ہر فورم پر آواز بلند کرتی رہے گی۔ مزید برآں انہوں نے کہا کہ نوجوان نسل کو مثبت سرگرمیوں کی جانب راغب کرنا وقت کی اہم ضرورت ہے تاکہ وہ ملک کی تعمیر و ترقی میں اپنا بھرپور کردار ادا کر سکیں۔ انہوں نے تعلیمی اصلاحات، صحت کے بہتر نظام اور روزگار کے مواقع پیدا کرنے پر بھی زور دیا اور کہا کہ جب تک عوام کو بنیادی سہولیات میسر نہیں ہوں گی، اس وقت تک خوشحال پاکستان کا خواب شرمندہ تعبیر نہیں ہو سکتا۔ انہوں نے حکومت سے مطالبہ کیا کہ عوامی مسائل کو ترجیحی بنیادوں پر حل کیا جائے اور غریب طبقے کو فوری ریلیف فراہم کیا جائے تاکہ معاشرے میں پائی جانے والی بے چینی کا خاتمہ ممکن ہو سکے
