اسلام گڑھ کے مصروف ترین راستوں میں شمار ہونے والی پلائی موڑ روڈ حالیہ بارشوں کے بعد بدترین صورتحال
اسلام گڑھ (جاوید اقبال بٹ سے)اسلام گڑھ کے مصروف ترین راستوں میں شمار ہونے والی پلائی موڑ روڈ حالیہ بارشوں کے بعد بدترین صورتحال اختیار کر چکی ہے اور جگہ جگہ پانی جمع ہونے سے سڑک تالاب کا منظر پیش کر رہی ہے۔ پانی کھڑا ہونے کے باعث نہ صرف ٹریفک کی روانی شدید متاثر ہے بلکہ موٹر سائیکل سواروں، رکشہ ڈرائیورز اور پیدل چلنے والوں کو بھی شدید مشکلات کا سامنا ہے۔
مقامی ذرائع کے مطابق سڑک کی خستہ حالی اور نکاسی آب کے ناقص نظام کی وجہ سے معمولی بارش بھی بڑے مسئلے کا سبب بن جاتی ہے۔ کئی مقامات پر گہرے گڑھے بن چکے ہیں جو پانی میں چھپ جاتے ہیں، جس کے باعث آئے روز چھوٹے بڑے حادثات رونما ہو رہے ہیں۔ شہریوں کا کہنا ہے کہ رات کے وقت صورتحال مزید خطرناک ہو جاتی ہے کیونکہ پانی کے باعث سڑک کی اصل حالت کا اندازہ لگانا مشکل ہو جاتا ہے۔
علاقہ مکینوں، دکانداروں اور ٹرانسپورٹرز نے بتایا کہ اس صورتحال سے کاروبار بھی متاثر ہو رہا ہے جبکہ سکول جانے والے طلبہ کو بھی مشکلات کا سامنا کرنا پڑ رہا ہے۔ کئی افراد نے شکایت کی کہ بارہا متعلقہ حکام کو آگاہ کرنے کے باوجود کوئی مؤثر اقدام نہیں کیا گیا۔عوامی حلقوں نے محکمہ ہائی وے کی عدم توجہی پر شدید برہمی کا اظہار کرتے ہوئے کہا ہے
کہ حکام خوابِ خرگوش کے مزے لے رہے ہیں اور عوام کو مشکلات کے رحم و کرم پر چھوڑ دیا گیا ہے۔ شہریوں نے اعلیٰ حکام سے فوری نوٹس لینے، سڑک کی مرمت، گڑھوں کو پر کرنے اور نکاسی آب کے مستقل حل کا مطالبہ کیا ہے تاکہ مستقبل میں اس قسم کی صورتحال سے بچا جا سکے۔
