سوسائٹی فار آلٹرنیٹو میڈیا اینڈ ریسرچ کا المصطفیٰ ویلفیئر سوسائٹی شیخوپورہ کے تعاون سے میڈیا نمائندگان اور سول سوسائٹی کے لئے تربیتی نشست کا انعقاد
شیخوپورہ(بیوروچیف/شیخ محمد طیب سے)
مضر تمباکو اور نکوٹین مصنوعات کے بڑھتے ہوئے استعمال کے خلاف صوبائی سطح پر کوششوں کو مضبوط بنانے کے لیے سوسائٹی فار آلٹرنیٹو میڈیا اینڈ ریسرچ نے المصطفیٰ ویلفیئر سوسائٹی شیخوپورہ کے تعاون سے میڈیا نمائندگان، صحافیوں اور سول سوسائٹی کے اراکین کے لیے ایک آگاہی و تربیتی نشست کا انعقاد کیا۔اس نشست کا مقصد صحافیوں، سول سوسائٹی اور سماجی تنظیموں کو ایک ایسا پلیٹ فارم فراہم کرنا تھا جہاں وہ تمباکو انڈسٹری کے ہتھکنڈوں ، مصنوعات خصوصاً سگریٹس اور نئی نکوٹین مصنوعات جیسے ویپ اور نکوٹین پاوچز کے بڑھتے ہوئے استعمال کے خلاف عملی اقدامات پر غور کر سکیں۔ گفتگو کا مرکز خاص طور پر نوجوان نسل کو نکوٹین کی لت سے بچانے اور مقامی و صوبائی سطح پر مؤثر حکمت عملی اپنانے پر تھا۔تقریب میں اہم شخصیات نے شرکت کی
جن میں پروجیکٹ کوآرڈینیٹر ذیشان دانش، پروگرام مینیجر ثمرہ عارف، بینش ڈار سمیت مختلف سول سوسائٹی کے نمائندگان شامل تھے۔ شرکاء سے خطاب کرتے ہوئے ذیشان دانش نے میڈیا اور سول سوسائٹی کے کردار کی اہمیت پر زور دیتے ہوئے کہا کہ تمباکو اور نکوٹین مصنوعات کے بڑھتے ہوئے استعمال کی روک تھام کے لیے میڈیا، سول سوسائٹی اور صحافیوں کا مشترکہ کردار نہایت ضروری ہے، خصوصاً نوجوانوں کو اس لعنت سے بچانے کے لیے مربوط اقدامات وقت کی اہم ضرورت ہے۔ پروگرام منیجر المصطفیٰ ویلفیئر سوسائٹی ثمرہ عارف نے اس مسئلے کی سنگینی پر روشنی ڈالتے ہوئے
کہا کہ تمباکو اور نکوٹین کے استعمال میں کمی لانے کے لیے مضبوط قانون سازی، مؤثر عملدرآمد اور مسلسل عوامی آگاہی مہمات پر مبنی ایک جامع روڈمیپ کے اطلاق کی اشد ضرورت ہے۔ انہوں نے اس بات پر زور دیا کہ صوبائی اور ضلعی محکموں کے درمیان ہم آہنگی اور سول سوسائٹی کے ساتھ اشتراکِ عمل ہی دیرپا نتائج حاصل کرنے کا ذریعہ بن سکتا ہے۔اختتامی کلمات میں ذیشان دانش نے تمام میڈیا نمائندگان اور سول سوسائٹی کے اراکین کی شرکت کو سراہتے ہوئے
شکریہ ادا کیا۔ انہوں نے اس عزم کا اعادہ کیا کہ سوسا ئٹی فار آلٹرنیٹو میڈیا اینڈ ریسرچ، کولیشن فار ٹوبیکو کنٹرول پاکستان کے پلیٹ فارم سے تمام پارٹنرز کے ساتھ مل کر تمباکو کنٹرول کی کوششوں کو مزید مضبوط بنائیں گے تاکہ پنجاب کوتمباکو اور نکوٹین سے پاک صوبہ بنانے کے ہدف کے حصول کی جانب پیش رفت کی جا سکے۔نشست کا اختتام اس مشترکہ عزم کے ساتھ ہوا کہ تمباکو اور نکوٹین کے استعمال کی روک تھام کے لیے قانون پر عملدرآمد کو مزید سخت بنایا جائے گا، عوامی آگاہی مہمات کو وسعت دی جائے گی اور مختلف شعبوں کے درمیان تعاون کو فروغ دے کر عوامی صحت کا تحفظ یقینی بنایا جائے گا
