پمز میں فائر سیفٹی انتظامات انتہائی ناقص تھے، فائر پوائنٹ پر پانی بھی نہیں تھا: ذرائع
پمز میں فائر سیفٹی انتظامات انتہائی ناقص تھے، فائر پوائنٹ پر پانی بھی نہیں تھا: ذرائع
اسلام آباد: پمز اسپتال میں آگ لگنے سے نومولود بچوں کی اموات کے واقعے سے متعلق ریسکیو ذرائع کا بتانا ہے کہ اسپتال میں فائر سیفٹی انتظامات انتہائی ناقص تھے۔
ریسکیو ذرائع کے مطابق فائرہوز میں کپلنگز نہیں تھے، فائر پوائنٹ پر پانی بھی نہیں تھا، ہنگامی انخلا کے راستوں پر تالے لگے ہوئے تھے۔
ریسکیو ذرائع کے مطابق حادثے کے وقت انکیوبیشن سینٹر میں ڈاکٹرز، وارڈ بوائے،کوئی عملہ موجود ہی نہیں تھا۔
واضح رہے کہ بدھ کی صبح اسلام آباد کے پمز اسپتال کے گائنی وارڈ کی نرسری میں آگ لگنے سے 15 نومولود جھلس کر جاں بحق ہوگئے۔
ریسکیو ذرائع کا کہنا ہے کہ پمز اسپتال کی نرسری میں صبح 6 بج کر 45 منٹ پر ائیرکنڈیشن کمپریسر پھٹنے سے آگ لگی جو بجھادی گئی، کولنگ کا عمل جاری ہے۔
اسپتال حکام کا کہنا ہے کہ آگ لگنے کے وقت نرسری میں 16 بچے موجود تھے، لیڈی ڈاکٹر صرف ایک بچے کو بچاسکی جب کہ 15 جاں بحق ہوگئے۔