قائد اعظم کے پاکستان میں شرپسند عناصر اور انتہاپسندوں کی کوئی گنجائش نہیں، وزیر داخلہ
قائد اعظم کے پاکستان میں شرپسند عناصر اور انتہاپسندوں کی کوئی گنجائش نہیں، وزیر داخلہ
وزیر داخلہ محسن نقوی نے کہا ہے کہ ریاست کے خلاف ہتھیار اٹھانے اور قانون ہاتھ میں لینے کی اجازت ہرگز نہیں دی جائے گی اور بےامنی، انتشار اور انتہاپسندی پھیلانے والے عناصر سےآہنی ہاتھوں سے نمٹا جائے گا۔
وزیر داخلہ محسن نقوی سے جمیت علمائے پاکستان کے سیکرٹری جنرل اویس نورانی نے ملاقات کی جس میں مذہبی ہم آہنگی، رواداری اور قومی اتحاد پر تبادلہ خیال کیا گیا۔
ملاقات میں اتفاق کیا گیاکہ کسی بھی بےگناہ کے خلاف ہرگز کوئی کارروائی نہیں جائے گی اور بے گناہ افراد کو رہا کیا جائے گا، کسی بھی مدرسے کو بند نہیں کیا جائے گا اور شرپسندوں سےسختی سے نمٹا جائے گا۔
وزیر داخلہ کا کہنا تھاکہ قانون ہاتھ میں لینے کی اجازت ہرگز نہیں دی جائے گی، ریاست کے خلاف ہتھیار اٹھانے کی قطعاً اجازت نہیں دی جا سکتی اور قائد اعظم کے پاکستان میں شرپسند عناصر اور انتہا پسندوں کی کوئی گنجائش نہیں۔
انہوں نے کہا کہ بےامنی، انتشار اور انتہاپسندی پھیلانے والے عناصر سے آہنی ہاتھوں سے نمٹا جائے گا، مذہبی ہم آہنگی اور صبر وتحمل کے فروغ میں علمائے کرام کی قابل قدر خدمات ہیں، پائیدار امن اور رواداری کے فروغ کیلئے تمام طبقات کو بھر پور کردار ادا کرنا ہے، دینی تعلیم کا فروغ ہم سب کا مشترکہ فریضہ ہے۔
شاہ اویس نورانی کا کہنا تھاکہ پائیدار امن، رواداری اور بھائی چارے کے فروغ کیلئےہر ممکن تعاون کریں گے۔
