کراچی پولیس نے شہر میں احتجاج کی خبروں کو افواہ قرار دے کر شہریوں سے اس پر کان نہ دھرنے کی اپیل کی ہے۔

کراچی میں مذہبی جماعت کی احتجاج کی کال پر پولیس نے کارروائی کرتے ہوئے مختلف مقامات پر بھاری نفری تعینات کردی ہے۔

پولیس حکام کا بتانا ہے کہ اس وقت شہر کی صورتحال معمول کے مطابق ہے اور شہر میں کہیں بھی دھرنا اور احتجاج نہیں ہورہا، شہر میں دفعہ 144 نافذ ہے جس کی وجہ سے کسی کو احتجاج کی اجازت نہیں ہے جب کہ مظاہرین سے نمٹنے کے لیے پولیس تیار ہے، 144 کی خلاف ورزی پر سخت ایکشن ہوگا۔

پولیس حکام کا کہنا ہے کہ مختلف طریقوں سے افواہیں پھیلائی جا رہی ہیں، شہری افواہوں پر کان نہ دھریں، کراچی میں اس وقت تک کسی بھی جگہ احتجاج نہیں ہورہا، شہر کے مختلف علاقوں میں دھرنوں اور احتجاج کی افواہوں کے باعث مختلف علاقوں میں دکانیں لوگوں نے خود بند کردی ہیں۔

پولیس کے مطابق نیو کراچی میں احتجاج کی کوشش کی گئی مگر مظاہرین کو منتشر کردیا گیا جب کہ ہنگامہ آرائی میں ملوث 10 افراد کو حراست میں لے لیا ہے۔

پولیس کا کہنا ہے کہ نیوکراچی سندھی ہوٹل کے قریب مذہبی جماعت کا احتجاج ختم ہوگیا ہے اور صورتحال معمول پر ہے، سڑک ٹریفک کے لیے کھول دی گئی ہے۔