مسلم لیگ (ن) کے سینیٹر پرویز رشید نے کہا کہ پاکستان تحریک انصاف (پی ٹی آئی) ایسا وزیر اعلیٰ چن کر لائی جو پاکستان پر حملہ آور ہوتا ہے، ایسے شخص کو وزیر اعلیٰ بننے سے روکنا ہمارا فرض ہے۔

جیو نیوز سے گفتگو میں پرویز رشید کا کہنا تھاکہ دہشت گردوں کے خاتمے کے لیے سیاسی حمایت کی ضرورت ہوتی ہے، صوبائی حکومت اگر دہشت گردوں کی سہولت کار ہو تو یہ مقدس فریضہ سرانجام نہیں دیا جا سکتا۔

انہوں نے کہا کہ پی ٹی آئی ایسا وزیر اعلیٰ چن کر لائی جو پاکستان پر حملہ آور ہوتا ہے، ایسے شخص کو وزیر اعلیٰ بننے سے روکنا ہمارا فرض ہے۔

ان کا کہنا تھاکہ شہدا کی فیملیز کو کیا جواب دیں گے؟ تمام جمہوری جماعتوں سے اپیل کرتے ہیں کہ اس فتنے کا مقابلہ کرنا چاہیے۔

پرویز رشید کا کہناتھاکہ اس شخص کو وزیراعلیٰ بننے سے روکنے کے لیے سیاسی، جمہوری اور آئینی اختیارات کا استعمال کیا جائے، اس جیسے کسی شخص کو خیبر پختونخوا میں حکومت میں نہ آنے دیں جو دہشت گردی کے خلاف جنگ میں دہشت گردوں کا ساتھ دے۔

خیال رہے کہ گزشتہ دنوں عمران خان نے علی امین گنڈاپور کو وزارت اعلیٰ سے ہٹانے کا حکم دیا تھا اور ان کی جگہ سہیل آفریدی کو نیا وزیراعلیٰ نامزد کیا ہے۔

علی امین نے وزارت اعلیٰ کے عہدے سے مستعفی ہوگئے۔