اسلام آباد: وزیراعظم پاکستان شہباز شریف نے قطری دارالحکومت دوحہ میں اسرائیلی فورسز کی جانب سے حملے کی شدید مذمت کی ہے۔

اپنے بیان میں وزیر اعظم کا کہنا تھا کہ ’پاکستانی عوام اور حکومت کی جانب سے اور اپنی جانب سے میں قطر کے دارالحکومت دوحہ میں اسرائیلی فورسز کی بمباری کی سخت مذمت کرتا ہوں۔

انہوں نے کہا کہ اسرائیلی حملے میں بے گناہ شہریوں کی جانیں خطرے میں ڈالی گئیں۔

وزیرِاعظم نے اس مشکل گھڑی میں امیر قطر شیخ تمیم بن حمد آل ثانی، قطری شاہی خاندان اور عوام سے گہری ہمدردی اور یکجہتی کا اظہار کیا۔ 

شہباز شریف  نے کہا کہ اسرائیل کا یہ اقدام مکمل طور پر ناجائز، قطر کی خودمختاری اور علاقائی سالمیت کی کھلی خلاف ورزی اور ایک ایسا خطرناک اور اشتعال انگیز عمل ہے جو خطے کے امن و استحکام کو شدید نقصان پہنچا سکتا ہے۔

وزیرِاعظم نے اس عزم کا اعادہ کیا کہ اسرائیلی جارحیت کے خلاف پاکستان قطر اور فلسطینیوں کے ساتھ کھڑا ہے۔

خیال رہےکہ اسرائیل نے آج قطری دار الحکومت دوحہ میں فلسطینی مزاحمتی تنظیم حماس کے دفتر کو نشانہ بنایا۔

عرب میڈیا نے ذرائع کا حوالہ دیتے ہوئے کہا ہے کہ حملے کے وقت دفتر میں حماس کی اعلیٰ قیادت موجود تھی جو غزہ جنگ بندی معاہدے پر غور کررہی تھی۔