وزیرمملکت برائے داخلہ طلال چوہدری نے بیرون ملک موجود یوٹیوبرز کے حوالے سے کہا ہے کہ  یہ جھوٹا بیانیہ بناتے، جھوٹ بیچتے اور جھوٹ بولتے ہیں جس پر انہیں سزائیں ہوئی ہیں۔

جیو نیوز سے گفتگو میں طلال چوہدری کا کہنا تھاکہ پاکستان میں درج مقدمات میں اشتہاری قرار دیے گئے لوگوں کو پاکستان لانے کی کوشش کر رہے ہیں، برطانیہ میں عدالتوں نے ان لوگوں کے خلاف فیصلے دیے ہیں اور اعلیٰ عدالتوں نے ان کے خلاف فیصلوں میں کہا یہ جھوٹے لوگ ہیں۔

انہوں نے کہا کہ یہ جھوٹا بیانیہ بناتے، جھوٹ بیچتے اور جھوٹ بولتے ہیں جس پر انہیں سزائیں ہوئی ہیں، یہ ہم نہیں بلکہ برطانیہ کا نظام عدل اور ان کی عدالتیں کہہ رہی ہیں، یہ لوگ برطانیہ کی شہرت کو بھی نقصان پہنچا رہے ہیں، ایسے ہر شخص کے خلاف پاکستان قانونی کارروائی کرنے کا حق رکھتا ہے۔

طلال چوہدری سے سوال کیا گیاکہ وزارت داخلہ کے ساتھ کیا وزارت خارجہ بھی اس معاملے میں برطانوی حکام سے رابطے میں ہے؟ اس پر ان کا کہنا تھاکہ یہ پاکستان کا کیس ہے کسی ایک فرد کا نہیں، پاکستان کے ہر ڈیپارٹمنٹ پر جو ذمہ داری ہے وہ پوری کر رہا ہے۔

ان کا مزید کہنا تھاکہ یہ لوگ سوشل میڈیا سے اب اپنی پرانی ویڈیوز ڈیلیٹ کیوں کر رہے ہیں؟ یہ لوگ اب مکر کیوں رہے ہیں خود کو علیحدہ کیوں کر رہے ہیں؟