اسلام آباد: وزیر دفاع خواجہ آصف نے کہا ہےکہ  فوج پر تنقید ہم نے بھی کی لیکن کبھی سرخ لکیرعبور نہیں کی۔

جیو نیوز کے پروگرام آج شاہ زیب خانزادہ کے ساتھ میں بات کرتے ہوئے خواجہ آصف نے کہا کہ بانی پی ٹی آئی کے حوالے سے نیوزکانفرنس میں فطری اورقدرتی ردعمل دیا گیا ہے۔

انہوں نے کہا کہ اگر پی ٹی آئی والے دہشتگردی کے خلاف جنگ نہیں لڑ سکتے، اس جنگ کو اپنا نہیں سکتے، شہیدوں کے جنازے نہیں پڑھ سکتے، اور اس کے بجائے ہندوستانی میڈیا کو پاکستان کے خلاف انٹرویو دیتے ہیں تو پھر یہی زبان سنیں گے جو سنی ہے۔ 

وزیر دفاع کا کہنا تھا کہ پچھلے چار پانچ سال میں حالات خراب ہونے کی ذمہ داری عمران خان پر ہے،  ان کی ہمشیرہ کی بھارتی میڈیا سے گفتگو فیصلہ کن مرحلہ ثابت ہوئی، بھارت کے ساتھ کشیدہ ماحول میں انھوں نے جان بوجھ کرانٹرویو دیا۔

خواجہ آصف نے مزید کہا کہ سوشل میڈیا پرسب کچھ پی ٹی آئی کی مرضی سے ہورہا ہے،  جوکچھ سوشل میڈیا پرہورہا ہے کیا کبھی پی ٹی آئی نے اس کی مذمت کی ہے؟