کراچی: پاکستاں کرکٹ ٹیم کے سابق کپتان شاہد آفریدی کا کہنا ہےکہ بھارت کا میڈیا 50 فیصد بالی وڈ اور 50 فیصد کارٹون نیٹ ورک ہے، نریندر مودی کے جنگی جنون نے بھارت کو بندگلی میں دھکیل دیا ہے، بھارت کو اب اندازہ ہوگیا کہ پاکستان سے الجھنا مہنگا پڑگیا۔

بھارتی جارحیت کا منہ توڑ جواب دینے اور آپریشن بُنیان مّرصُوص کی کامیابی پر  سی ویو کراچی پر یوم تشکر ریلی سے خطاب کرتے ہوئے شاہد آفریدی کا کہنا تھا کہ آج ہم امن کے لیے باہر نکلے ہیں،  پاکستاں کی افواج کو سلیوٹ کرتا ہوں، پاکستان کا دفاع ناقابل تسخیر ہے، پاکستان کا ایک ایک بچہ پاک فوج کے ساتھ ہے، میں اپنی فیملی اور دوستوں کی جانب  سے پاک فوج کو مبارک باد پیش کرتا ہوں۔

شاہد آفریدی کا کہنا تھا کہ بھارت کو اب اندازہ ہوگیا کہ پاکستان سے الجھنا مہنگا پڑگیا، بھارت کا میڈیا 50 فیصد بالی ووڈ اور 50 فیصد کارٹون نیٹ ورک ہے، نریندر مودی کے جنگی جنون نے بھارت کو بند گلی میں دھکیل دیا ہے، بھارت میں لوگ پیار محبت سے چلنا چاہتے ہیں لیکن مودی بھارتیوں کوبدنام کررہا ہے۔

 سابق کپتان کا کہنا تھا کہ بھارت نے ہمارے معصوم بچوں کو شہید کیا، سویلین آبادی پر حملےکیےگئے، لوگ شہید ہوئے، مساجد شہید کی گئیں،کئی معصوم شہید ہوئے، آپ نے ہمارے بچوں کو سویلینز کو مارا ہے، آپ ایک ثبوت بتا دو کہ ہم نے آپ کےکسی سویلین کو مارا ہو، ہماری فوج سے لڑو تاکہ پتا چلےکہ تم کتنے تگڑے ہو۔

شاہد آفریدی کا کہنا تھا کہ ہم امن پسند لوگ ہیں، ہمارا مذہب امن کا درس دیتا ہے، 70 سے 80 ہزار لوگ ہمارے شہید ہوئے ہیں،  پاکستان خود دہشت گردی کا شکار ہے ، بغیر ثبوت کے پہلگام واقعےکا الزام ہم پر لگایا گیا، حملہ کیا ہے تو اب نتائج بھگتو، مودی پاکستان سمیت پوری دنیا میں بدنام ہو رہا ہے،کینیڈا میں سکھوں پر حملہ کیا وہاں منہ کی کھانا پڑی۔

ان کا کہنا تھا کہ ہم اپنے شہدا کو سلام پیش کرتے ہیں، ہمارا ملک بے مثال قربانیوں کے نتیجے میں ملا ہے اور  آج تک ہم قربانیاں دے رہے ہیں، اس ملک کے لیے جوانوں نے قربانی دی ہے ان کی قربانی ضائع نہیں ہوگی۔

شاہد آفریدی کا کہنا تھا کہ ہماری فوج نے کہا تھا کہ جب ہم حملہ کریں گے تو دنیا دیکھےگی، ہم نے کرکے دکھا دیا، بھارت کو ہماری صلاحیت کا اندازہ نہیں تھا لیکن اب اندازہ ہوگیا ہوگا، میں اب بھی کہتا ہوں محبت سے چلو ،کرکٹ ہونے دو، لوگوں کو ملنے دو،  ہم محبت کی بات کرتے ہیں آپ اپنے ملک میں نفرتیں پھیلا رہے ہیں۔