ٹی ایچ کیو ہسپتال اسلام گڑھ کو اسٹیٹ آف دی آرٹ بنانے کا اعلان
اسلام گڑھ (بیورو چیف جاوید اقبال بٹ سے) آزادکشمیر کے وزیر صحت ڈاکٹر مصطفیٰ بشیر عباسی نے تحصیل ہیڈ کوارٹر ہسپتال اسلام گڑھ کا تفصیلی دورہ کیا۔ ڈسٹرکٹ ہیلتھ آفیسر میرپور ڈاکٹر فدا حسین بھی ان کے ہمراہ تھے۔ ایم ایس ٹی ایچ کیو ہسپتال اسلام گڑھ ڈاکٹر ندیم احمد فضلداد نے وزیر صحت کو ہسپتال کے مختلف شعبہ جات کا دورہ کروایا اور طبی سہولیات سمیت جاری ترقیاتی و تعمیراتی کاموں کے حوالے سے بریفنگ دی۔
وزیر صحت ڈاکٹر مصطفیٰ بشیر عباسی نے دورے کے دوران پیڈز ایمرجنسی وارڈ کا افتتاح کیا۔ اس موقع پر انہیں عوام علاقہ کے تعاون سے زیرِ تعمیر آپریشن تھیٹر اور لیبارٹری ہالز بھی دکھائے گئے۔ وزیر صحت نے ہسپتال کے احاطے میں پودا بھی لگایا۔
عمائدین شہر اور عوام علاقہ سے گفتگو کرتے ہوئے وزیر صحت ڈاکٹر مصطفیٰ بشیر عباسی نے کہا کہ حکومت تحصیل ہیڈ کوارٹر ہسپتال اسلام گڑھ کو اسٹیٹ آف دی آرٹ ہسپتال بنانے کے لیے بھرپور اقدامات کرے گی۔ ان کا کہنا تھا کہ کوشش ہے کہ اسلام گڑھ اور ملحقہ علاقوں کے عوام کو علاج معالجے کی زیادہ سے زیادہ سہولیات مقامی سطح پر میسر آئیں اور انہیں معمولی نوعیت کے علاج کے لیے بھی دوسرے شہروں کا رخ نہ کرنا پڑے۔
انہوں نے کہا کہ ہسپتال میں بنیادی اور ضروری طبی سہولیات کی بہتری، جدید شعبہ جات کے قیام اور مریضوں کو بہتر ماحول فراہم کرنا حکومت کی ترجیحات میں شامل ہے۔ ہسپتال کی ضروریات کو مرحلہ وار پورا کرنے کے لیے متعلقہ حکام سے بھی مشاورت کی جائے گی۔
وزیر صحت نے ہسپتال کی تعمیر و ترقی میں عوام علاقہ کے کردار کو خصوصی طور پر سراہتے ہوئے کہا کہ مقامی لوگوں نے جس جذبے کے ساتھ ہسپتال کی بہتری میں دلچسپی لی ہے وہ قابلِ تحسین ہے۔ عوام کے تعاون سے خطیر رقم سے دو ہالز تعمیر کیے جا رہے ہیں، جو اجتماعی احساسِ ذمہ داری اور علاقے سے محبت کی بہترین مثال ہے۔
انہوں نے کہا کہ سرکاری اداروں کے ساتھ عوام کا تعاون بھی کسی علاقے کی ترقی میں اہم کردار ادا کرتا ہے اور اسلام گڑھ کے لوگوں نے ہسپتال کی بہتری کے لیے جس جذبے کا مظاہرہ کیا ہے اسے قدر کی نگاہ سے دیکھا جاتا ہے۔
عوامی حلقوں نے وزیر صحت کے دورے اور پیڈز ایمرجنسی وارڈ کے افتتاح کو خوش آئند قرار دیتے ہوئے امید ظاہر کی کہ ہسپتال میں آپریشن تھیٹر، لیبارٹری، ایمرجنسی، ادویات، ڈاکٹرز اور دیگر طبی سہولیات میں مزید بہتری لائی جائے گی، تاکہ اسلام گڑھ اور گردونواح کے عوام کو معیاری طبی سہولیات ان کی دہلیز پر دستیاب ہو سکیں۔
اس موقع پر سابق امیدوار اسمبلی محمد نذیر انقلابی، پروفیسر نذیر چوہدری، چوہدری عبدالرزاق، حاجی خالد حسین، پروفیسر طارق محمود، محمد فاروق، ملک ساجد محمود، چوہدری سوداگر علی، خلیق الرحمن سمیت عمائدین شہر اور عوام علاقہ کی کثیر تعداد موجود تھی۔