ترکیے کے صدر رجب طیب اردوان نے امریکا اور ایران کے درمیان حالیہ اعلان کردہ جنگ بندی کا خیرمقدم کرتے ہوئے اس امید کا اظہار کیا ہے کہ یہ معاہدہ کسی بھی قسم کی اشتعال انگیزی یا تخریبی کارروائی سے محفوظ رہتے ہوئے مکمل طور پر نافذ العمل ہوگا۔

اپنے سرکاری سوشل میڈیا پیغام میں صدر اردوان نے خطے کی حالیہ کشیدہ صورتحال کا حوالہ دیتے ہوئے کہا کہ 28 فروری سے جاری وہ تنازع جس نے پورے خطے کو عملی طور پر جنگ کے دہانے پر لاکھڑا کیا، اس کے بعد گزشتہ شب ہونے والا جنگ بندی کا اعلان ایک مثبت اور حوصلہ افزا پیش رفت ہے۔ 

انہوں نے اس پیش رفت پر اطمینان کا اظہار کرتے ہوئے کہا کہ اب اصل امتحان اس بات کا ہے کہ اس جنگ بندی کو عملی میدان میں کس حد تک مؤثر انداز میں برقرار رکھا جاتا ہے۔

صدر اردوان نے زور دیا کہ کسی بھی ممکنہ اشتعال، سازش یا تخریب کاری کو موقع دیے بغیر اس معاہدے پر مکمل عملدرآمد ناگزیر ہے کیونکہ ایسے نازک موقع پر معمولی سی لغزش بھی دوبارہ کشیدگی کو جنم دے سکتی ہے۔ 

انہوں نے اس سلسلے میں ان تمام ممالک اور شخصیات کی کاوشوں کو سراہا جنہوں نے جنگ بندی کے حصول میں کردار ادا کیا خصوصاً پاکستان کو ’دوست اور برادر ملک‘ قرار دیتے ہوئے اس کی سفارتی کوششوں کو دل سے خراجِ تحسین پیش کیا۔

اپنے بیان میں انہوں نے مزید کہا کہ یہ خطہ ماضی میں جنگ، تصادم، کشیدگی اور انسانی المیوں کا طویل عرصہ برداشت کرتا رہا ہے، اور اب وقت آ گیا ہے کہ یہاں کے عوام کو امن، سکون اور استحکام نصیب ہو۔ 

ان کے بقول پائیدار امن نہ صرف خطے بلکہ پوری دنیا کے مفاد میں ہے اور اس کے لیے تمام فریقین کو ذمہ داری، بردباری اور سنجیدگی کا مظاہرہ کرنا ہوگا۔

صدر اردوان نے اس عزم کا اعادہ کیا کہ ترکیہ ہمیشہ کی طرح خطے اور عالمی سطح پر امن، مکالمے اور مفاہمت کے فروغ کے لیے اپنی آواز بلند کرتا رہے گا اور ہر اس اقدام کی حمایت جاری رکھے گا جو دنیا کو تنازعات سے نکال کر استحکام اور خوشحالی کی جانب لے جائے۔